اسرار بنات

السلام عليكم

هذا أول مشوار لي في عالم القصص والروايات لم أعتقد في يوم سأكتب ولكن شاءت الاقدار
أتمنى أن أوفق في كتاباتي,,,,

رواية:"أسرار بنات "
حنــــــــــا البنات سالفتنا سالفه
بس نبي نعشق وأحبك وتحبني
ما عدنا غير هالمـــوال وسوالف المايعه
حبيبـــــي اسمع هالأغنيه وتخيلني
اجول لابو الحــب لابو الجنان يا الفاضيه
هذه الابيات من تاليفي الخاص؛؛شـهــــــد الــــــــروح؛؛

ندخل في شخصيات الرئيسيه للقصة ثلاث بنات
ريم:بنت بعمر العشرين هاديه,بيضاء,تتمتع بسواد العين وجسم رشيق.

غزلان:أكبر وحده فيهم ف حدود 24 سنه,عيونها ناعسه وعسليه,شعرها طويييييييل
ياربي على شفايفها شرات الكرز,بس جسمها مخرب دبدوبه.

دلع: اسم على مسمى دلوعه زياده عن اللزوم,22سنة
ومليانه بس مب شرات غزلان,وما شاء الله عيونها روعه عسليه وشرات عيون النمر،وسمرا فدييييت سمر والله ههههه.
وباجي الشخصيات بتعرفونها من خلال الاحداث والقصة نفسها،،،،
الجزء الأول::::
غزلان:يا ربي يوعااااانه خلونا نطلب نطبخ أي شي المهم نأكل(حشا مب بنت ههه)
ريم :غزلان يا ربي منج على طول تبين تأكلين.
غزلان: حبيبتي ريم فديتج طلبي من المطعم ترا والله أموت عليكم
تتبادل ريم نظرات مع دلع بمعنى شو هالحاله
وترجع غزلان تصارخ(البلاد كلها عرفت أنها يوعانه)
دلع تظل ساكته كالعاده وكل شي يطيح على راس ريم المسكينه وترضخ لصراخ غزلان وتتصل على أقرب مطعم
ويوصل الاكل وأول يد تغوص طبعا يدين غزلان وتضرب بالخمس ذاك المجبوس على كيف كيفكم(ليش كنت وياهم أنا هههه)
واما دلع وريم يأكلون بهدوووء،،ولازم T.v
مشغل العيون صوب المسلسلات والايادي صوب المجبوس خخخخ
المهم يقومون بس تبقى الانسة غزلان لازم تقضي على كل حبة عيش وبعدها يالله يالله تقوم تغسل ايدها وصحون لهن الله ما يتنظفن
نسيت اخبركم أنهن جامعيات يعني دراسه وخبصه هههه
وكل هذا يصير من بعد ما يرجعون من الجامعه روتين يومي يأكلون وعلى طووول كلهم الفراش ينتظرهم ونوووووووم لحد المغرب
عاد من عقب ما ناس تأذن وتصلي وكل شي تقوم كل وحده بالغصب عين مفتوحه وعين مغمضه يصلن جم ركعه قامت نشت خلصت صلاه ههه(استغفر الله)
عاد هنا تصير المشكله غزلان تبا ترجع تنام ودلع تبا تفرفر على الكتب شوي(خفي علينا يا المثقفه)
أما ريم عادي عندها لانها دوم على فونها حد قايم حد نايم ما يهمها ويصير الأكشن بين غزلان ودلع
غزلان:سكري على ضوء ابا انام
دلع:لا انا ابا أذاكر (عاد دلع ما بس دلوعة عندها صفة العناد وطبعا ف الأخير هي تفوز من زود عنادها وتضطر غزلان تنام بوجود ضوء يضرب ف عيونها مسكينة
وريم سرحانة تسمع أغاني(أعتقد عاشت حياة الخيال في هاذي الدنيا أكثر من واقعها)
طبعا لحد الحين الأمور ماشيه تمام وكل وحده محتفظه بسر من الأسرار وما صار وجت الكشف عنها،،،
تقوم غزلان من نومتها وأول كلمة تجولها يوعاااانه يالله خلونا نسوي عشاء
عاد هالمره دلع تشارك وتقوم مع غزلان وأكيييد ريموه وياهم ويخبصون ودلع تبا تراويهم مهاراتها في الطبخ بس ياليت يطلع حلو(الله يلوع بجبدها)
من عقب المهارات والتفنن يطيح الضرب مع المشروبات الغازيه أهم شي في حياتهن،ومن بعدها يصير وجت التلفزيون وما تبقى محطة أغاني ما يخلونها عاد ريموه تسرح ودلع ترجص وغزلان الله يعلم ههههه
لحد نص الليل وهن على هالحال بس بعدين فجأه ينقلب الحال وتبدأ وشوشة الفونات ومعاها تبدأ المغامرات ورمنسيات اليومية بس بدون ما تجول كل وحده حج الثانيه أنها تحب أو تعرف حد..
لكن ريم طبعها ما تعرف تحتفظ بأسرارها أو يخونها لسانها ساعات وتبدأ تكشف وجمعت البنات وجالت:سمعوا يا بنات بصراحه حابه اخبركم شي على طول جالت أنا احب بدون سابق انذار او مقدمات
عاد دلع وغزلان ما استغربن لان كل وحده حاسه شو تسوي الثانيه المهم من بعد كشف اول سر تشجعت غزلان وكشفت عن سرها وأنها متعلقه بشخصين تحب وتموت بالأول وتبا تتزوج الثاني وبنعرف يمكن يطلعون مجموعه من الشباب مب بس 2 خخخخ
وأكيد دلع دام شافت الكل كشف أوراقه حبت هي تشارك بسرها ونفس الحاله الاخت بعد تحب،،،من بعدما انكشفت الاسرار وصارت كل وحده تعرف الثانيه تعيش غراميات صار سهل كل وحده اذا جاها اتصال من العاشق الولهان أنها تتكلم بكل حريه وبدون خوف
لا تعتقدون أن هاذي كل الاسرار لا فما خفي أعظم(الله يستر بس ههه)
المهم طبعا كل وحده غطت في نووووم عميق بعد مكالمه دامت لساعات الصباح وكلها جم ساعه وصار وجت دوام الجامعه
عاد يالله أكره وجت عند البنات خلاص لا عين راضيه تفتح ولا عقل راضي يشتغل ولا جسم راضي يقوم وكله سبة هذا السهر بس من يسمعن صوت هرن الباص يفزن وغزلان تركض صوب الحمام(كرمكم الله) ودلع تيلس تضارب شعرها
أما ريموه بدون لاتغسل ويها ولا ترتب شعرها على طول العباءه فوقها(انزين على الاقل غسلي ويهج يا الخايسه)
المهم اخر ناس يدشون الباص هن دلع تمسك هالاذكار وتقرأ وغزلان ما تخلي حد ما طالعه وتضحك له (الابتسامه في ويه الناس صدقه)
ريم لا أذكار ولا ابتسامات عند صبح ما تعرف حد(هرم من الاهرامات صامته)
طبعا ما في أحداث تصير وايد في الجامعه لان كل شي يصير بعد خروجهن المكالمات وتعارف السهر والغرام كان كله خارج اطار الجامعه
الجامعه مجرد يحضرن ويخلصن هالمحاضرات ولا فاهمات شي يعني تمشية حال بس،،،ويمضي يومهن في الجامعه حاله حال باجي الايام وينتهي الدوام
ويرجعن شقتهن جريبه من الجامعه بس اليوم غزلان فأجات ريم ودلع أنها بتطلععلو وين؟؟ومع من؟؟؟(غزلان بس تجرد تجاوب)
استغربن وجالن الحين راجعين وتعبانين وأنتي تبين تطلعين؟؟؟؟؟وين تبين تسيرين إن شاء الله؟
غزلان:أن بطلع بروحي يعني أنتن ارتاحن واكلن ونامن بعد
زادت حيرتهم بروحج؟؟؟
غزلان :هي بروحي خلاص مابا أسئله يالله بااااي اشوفكن بالليل.
وطلعت غزلان وخلت عقول البنات تشتغل يا ترى هالبنت على شو ناويه؟؟؟
أهم شي عند ريم ودلع ارتاحن منها ومن إزعاجها وناموا بدون أكل وطبعا عادي ما ياكلن(الدبه محد خخ اجصد غزلان)
ومرت الساعات والاخت غزلان ما شرفت ولا الخوات قامن لا حج صلاه المغرب ولاصلاة عشاء وعند الساعه 9 قامت دلع وعلى طول صوب ريم فزت ريم بدون أي مقاومات(هههه مطيعه ما شاء الله)
كل وحده خذتلها سبحه ودلع صلت الصلوات الفايته أما ريم كانت يوم تصلي وأيام لا(الله يهديها ويهدي كل المجصرين في دينهم)
بعد ما خلصت دلع جالت:ما اتصلت غزلان أو حتى رسلت تخبرج شي؟؟
ريم:لاوالله لا اتصال ولا مسج
دلع: اتصلي عليها صار لها كم ساعه طالعه ولا نعرف وين؟
ريم:أوك.
وتتصل ريم ورد كان(تعذر الحصول على المشترك المطلوب الرجاء المحاوله في ما بعد)
طبعا كانت صدمه لريم ودلع أول مره تغيب عليهم والمصيبه أنهم ما يعرفون وين هي وهل صار عليها شي
وظلوا يتصلون وكل محاولاتهم فاشله ما جدروا يوصلون حج أي شي
كل هذا زاد توتر وما حسن إلا ودموعهن على خدهن
خـــــــــوف،،،،قلـــــــق،،،،توتـــــــــــــــــ ـــــر
حتى الاكل ما صار لهن رغبه فيه ويمر الوجت وغزلان بعدها ما وصلت ولا ردت على اتصالاتهم
ياتـــــــــــرى غزلان وين؟؟؟؟
وهل كانت بروحها؟؟؟؟؟وليش فونها مغلق؟؟؟؟؟
كل هذه الاحداث بتعرفونها في الجزء الثاني إن شاء الله من رواية أســـــــرار بنـات